གཡུ་འབྲུག་མཉམ་འབྲེལ་ལྷན་ཁང་གིས་འབྲོག་དམངས་ལུས་རྩལ་བྱ་འགུལ་སྤེལ།

ཐེམ་ཆེན་རྫོང་གཡུ་འབྲུག་མཉམ་འབྲེལ་ལྷན་ཁང་གིས༼འབྲོག་དམངས་རིག་གནས་ལུས་རྩལ་བྱ་འགུལ་སྐབས་དང་པོ་དང་ཐོན་ལས་གྲུབ་འབྲས་འགྲེམ་སྟོན་ཚོགས་ཆེན༽གྱི་བྱ་འགུལ་སྤེལ། 

གསར་འགོད་པ། སྒོ་མེ་དོན་ཚེ། བོང་སྟག་རི་ལུ། ལྕགས་འབུམ་རྒྱལ། 

    བཅོས་བསྒྱུར་སྒོ་འབྱེད་བྱས་ནས་ལོ་འཁོར༤༠དང་། ཏང་གི་ཚོགས་ཆེན་བཅུ་དགུ་བའི་དགོངས་དོན་ལག་ལེན་དོན་འཁྱོལ་བྱེད་པ། དམངས་ཀྱི་འཚོ་བ་ཕུན་སུམ་ཇེ་ཚོགས་སུ་གཏོང་ཆེད་དུ། སྤྱི་ཟླ༩ཚེས༥ཉིན། ཐེམ་ཆེན་རྫོང་གཡུ་འབྲུག་མཉམ་འབྲེལ་ལྷན་ཁང་གིས༼འབྲོག་དམངས་རིག་གནས་ལུས་རྩལ་བྱ་འགུལ་སྐབས་དང་པོ་དང་ཐོན་ལས་གྲུབ་འབྲས་འགྲེམ་སྟོན་ཚོགས་ཆེན༽གྱི་བྱ་འགུལ་དེ་ཐེམ་ཆེན་རྫོང་གི་རྟ་རྒྱུག་ཐང་དུ་སྤེལ།

   ཐེངས་འདིའི་མཛད་སྒོ་ལ་ཐེམ་ཆེན་རྫོང་གི་འབྲེལ་ཡོད་འགོ་ཁྲིད་དག་གཙོ་བྱས་ཏེ། གཡུ་འབྲུག་མཉམ་འབྲེལ་ལྷན་ཁང་ཁོངས་གཏོགས་ཀྱི་མཉམ་ལས་ཁང་བཅུ་གཅིག་ཞུགས་ཡོད་ལ། ཐོག་མར་འབྲེལ་ཡོད་འགོ་ཁྲིད་ཀྱིས་གཏམ་བཤད་གལ་ཆེན་གནང་།

ཐེམ་ཆེན་རྫོང་གི་རྫོང་དཔོན་གཞོན་པ་ཨ་བྷོ་ཡིས་ཤིས་ཚིག་འབུལ་བཞིན་པ། 

ཐེམ་ཆེན་རྫོང་སྲིད་གྲོས་ཀྱི་ཀྲུའུ་ཞི་ཧི་ཙི་པོ་ཡིས་མཛད་སྒོ་དངོས་སུ་ཁྱབ་སྒྲོག་བྱས་པ།

   བྱ་འགུལ་འདི་དང་བསྟུན་ནས།རིམ་གྱིས་རིག་རྩལ་འཁྲབ་སྟོན་སྣ་ཚོགས་ཏེ། གླུ་དང་། གླུ་དབྱངས། རྡུང་ལེན། བཤད་པ་སོགས་རིག་རྩལ་འཁྲབ་སྟོན་གྱ་ནོམ་པ་ཡིས་མཛད་སྒོའི་ཡོ་ལངས་རབ་ཏུ་ཕྱེས།

   གཡུ་འབྲུག་མཉམ་འབྲེལ་ལྷན་ཁང་ནི༢༠༡༤ལོར་གསར་དུ་བཙུགས་པ་ཞིག་ཡིན་ལ། མཉམ་འབྲེལ་ཁང་འདིའི་ཁོངས་གཏོགས་སུ་མཉམ་ལས་ཁང་བཅུ་བཞི་ཡོད་ལ། དེའི་ནང་མ་རྐང་བཅོས་བསྒྱུར་བྱས་ཟིན་པའི་མཉམ་ལས་ཁང་བཅུ་གཅིག་ཡོད།ལོ་ངོ་འདི་དག་གི་རིང་ལ། སྐྱེ་ཁམས་ཁོར་ཡུག་སྲུང་སྐྱོབ་བྱེད་པ་དང་བསྟུན་ནས། མཉམ་ལས་ཁང་སོ་སོའི་རང་སྟེང་གི་ནུས་པ་འདོན་སྤེལ་བྱས་པ་དེས་ས་གནས་ཀྱི་དཔལ་འབྱོར་འཕེལ་རྒྱས་དང་གནད་ཕིགས་དབུལ་སྐྱོར་ལ་རོགས་སྐྱོར་གང་ལེགས་ཐོབ་ཡོད་པར་མ་ཟད། ཐོན་སྐྱེད་སོ་སོའི་མཉམ་ལས་དང་མཉམ་རྒྱལ་ལ་རོགས་འདེགས་གང་ལེགས་ཐོབ་ཡོད།

མཚོ་ནུབ་རྒྱང་སྒྲོག་བརྙན་འཕྲིན་ཁང་གིས་གཡུ་འབྲུག་མཉམ་ལས་ལྷན་ཁང་གི་སྤྱིའི་ལས་འཛིན་པ་ཕུན་ཚོགས་བཀྲ་ཤིས་ལ་བཅར་འདྲི་བྱེད་ཀྱིན་པ།

    ཐེངས་འདིའི་བྱ་འགུལ་ནི་ཉིན་ལྔའི་རིང་ཡིན་པ་དང་། བྱ་འགུལ་གྱི་རྣམ་གྲངས་ལ་རིག་རྩལ་འཁྲབ་སྟོན་དང་། འཇུ་བ། ཐག་འཐེན། འགྱིག གླང་ཆེན་ས་གཤགས། ས་འགྱོག རྟ་རྒྱུག གཡག་རྒྱུག ལ་གཞས་འགྲན་སྡུར་་སོགས་མང་ཚོགས་རྣམས་ཆེས་དགའ་བའི་རིག་གནས་དང་ལུས་རྩལ་གྱི་འགྲན་སྡུར་གང་མང་ཞིག་ཡོད་པས། དམངས་ཀྱི་འཚོ་བ་ཕུན་སུམ་ཇེ་ཚོགས་སུ་བཏང་ཡོད་ལ། ཐེམ་ཆེན་རྫོང་རིག་གནས་ལུས་རྩལ་རྒྱང་སྒྲོག་བརྙན་འཕྲིན་ཡུལ་སྐོར་ཅུའུ་དང་། མཚོ་ནུབ་རྒྱང་སྒྲོག་བརྙན་འཕྲིན་ཁང་བོད་སྐད་ལྟེ་གནས། དོན་གྲུབ་བརྙན་ཟློས་རིག་གནས་སྨྱན་བྱད་ལས་སྒྲུབ་ཁང་བཅས་ཀྱིས་རོགས་སྒྲུབ་བྱས་ཡོད།

   འདི་ལྟ་བུའི་རིག་གནས་ལུས་རྩལ་བྱ་འགུལ་སྤེལ་བ་འདིས། ས་གནས་མང་ཚོགས་ཀྱི་འཚོ་བ་ཕུན་སུམ་ཇེ་ཚོགས་སུ་བཏང་བར་མ་ཟད། དམངས་ཡོངས་ཀྱིས་རིག་གནས་དང་ལུས་རྩལ་གྱི་བྱ་འགུལ་རེ་རེ་བརྒྱུད་ནས། ཏང་གི་སྲིད་ཇུས་བཟང་བོ་དང་དམངས་ཀྱི་འཚོ་བ་བཟང་བོ་མཚོན་པར་བྱས་ཡོད།