ལོ་སར་དུས་ཆེན་གྱི་གུང་གསེང་མཇུག་སྒྲིལ་ལ་ཉེ་བས།ས་གནས་དང་སྡེ་ཁག་སོ་སོས་གོ་རིམ་ལྡན་པའི་སྒོ་ནས་ཁེ་ལས་དང་།ལས་ཁུངས།སྒེར་གཉེར་བཟོ་ཚོང་།སློབ་གྲྭ་སོགས་ཀྱི་ལས་འགོ་སློབ་འགོ་ཚུགས་པར་རྩ་འཛུགས་བྱེད་པ་དང་སྦྲགས་བདེ་ཐང་འགོག་སྲུང་ཡག་པོ་བྱ་དགོས།འབྲེལ་ཡོད་ལས་རིགས་གཙོ་གཉེར་སྡེ་ཁག་སོ་སོས་ས་ཁུལ་གྱི་རིམས་འགོག་དོན་དངོས་ལ་གཞིགས་ནས་ལས་འགོ་འཛུགས་པའི་ཆ་རྐྱེན་གཏན་འཁེལ་བྱས་ཏེ། མཚོ་སྔོན་དུ་ཡོང་མཁན་དང་ལོག་མཁན་ཡོངས་ཀྱིས་ནན་ཏན་སྒོས་ཁྱིམ་སྡོད་ཟུར་བཀར་དང་གསོ་རིག་ལྟ་ཞིབ་སོགས་ཀྱི་བྱ་ཐབས་དོན་འཁྱོལ་བྱས་ནས་ལས་འགོ་འཛུགས་རྒྱུ་གོ་རིམ་ལྡན་ཞིང་བདེ་འཇགས་ཡོང་བར་འགན་ལེན་བྱེད་དགོས།ད་ལྟ་མཚོ་སྔོན་ཞིང་ཆེན་གྱི་འབྲེལ་ཡོད་ཁེ་ལས་དང་སྒེར་གཉེར་བཟོ་ཚོང་གི་ལས་འགོ་འཛུགས་རྒྱུ་དང་།རིམ་པ་སོ་སོ་དང་རིགས་སོ་སོའི་སློབ་གྲྭའི་སློབ་འགོ་འཛུགས་པར་“མི་ཆོག་པ་དྲུག་”བརྡ་ཁྱབ་བཏང་བ་གཤམ་གསལ་ལྟར།
གཅིག རྣམ་པ་གང་རུང་གི་རི་སྐྱེས་སྲོག་ཆགས་ཉོ་ཚོང་བྱ་འགུལ་གཏན་འགོག་བྱ་དགོས། མཚོ་སྔོན་ཞིང་ཆེན་གྱིས་ཐོལ་བྱུང་སྤྱི་བའི་འཕྲོད་བསྟེན་དོན་རྐྱེན་གྱི་རིམ་པ་དང་པོའི་ ་ཁ་གཏད་འཇལ་ཐབས་ལག་བསྟར་བྱེད་སྐབས།ཞིང་ཆེན་ནང་ཁུལ་གྱི་མེ་ཏོག་དང་འདབ་ཆགས་ཉ་འབུའི་ཁྲོམ་ར་དང་།གཅེས་ཉར་སྲོག་ཆགས་ཚོང་ཁང་།བཟའ་བཏུང་ལས་ཁུངས་ཆེ་འབྲིང་།གཟུགས་ཁྲུས་ལྟེ་གནས།སྤྱི་དམངས་ཁྲུས་ཁང་།ཆུ་རྐྱལ་ཁང་།ཐོག་བཀབ་ལུས་རྩལ་ར་བ་དང་།དེ་བཞིན་ཇ་ཁང་།ཆང་ཁང་།དྲ་ཁང་།གློག་བརྙན་ཟློས་གར་ཁང་།སྒྲོག་ངོས་སྤོ་ལོ་ཁང་།མིག་མངས་བྱང་ཤོག་ཁང་།གློག་རྩེད་ཁང་།KTVསོགས་མི་མང་འདུ་འཛོམས་བྱེད་པའི་ཡུལ་ཚང་མས་ལས་འགོ་འཛུགས་མི་ཆོག
གཉིས།རིམས་ནད་སྔོན་འགོག་ཚོད་འཛིན་མི་སྣ་དང་།འགྲོ་གྲོན།དངོས་ཟོག་བཅས་དོན་འཁྱོལ་མ་བྱས་པ་དང་།ནང་ཁུལ་གྱི་རིམས་ནད་སྔོན་འགོག་ཚོད་འཛིན་ལམ་ལུགས་ཀྱི་ཇུས་གཞི་འཐུས་ཚང་མེད་པ།ལས་བཟོ་བའི་བདེ་ཐང་འགོག་སྲུང་སོགས་རིམས་ནད་སྔོན་འགོག་ཚོད་འཛིན་གྱི་བྱ་ཐབས་གནད་ལ་མི་འཁེལ་བའི་ཁེ་ལས་ཚང་མས་ལས་འགོ་འཛུགས་མི་ཆོག
གསུམ།ཞིང་ཆེན་སློབ་གསོ་སྲིད་འཛིན་གཙོ་འགན་སྡེ་ཁག་གིས་སློབ་འགོ་ཚུགས་པའི་དུས་ཚོད་གསལ་པོ་མ་བཟོས་གོང་།རིམ་པ་སོ་སོ་དང་རིགས་སོ་སོའི་སློབ་གྲྭ་དང་གསོ་སྦྱོང་ལས་ཁུངས་ཀྱིས་གསབ་ཁྲིད་དང་།དོགས་གཞིར་ལན་འདེབས་པ།ཟུར་ཁྲིད་བྱེད་པ་སོགས་རྣམ་པ་གང་གིས་ལས་ཡུལ་དངོས་ཀྱི་གཅིག་སྡུད་རང་བཞིན་གྱི་སློབ་ཁྲིད་བྱེད་སྒོ་རྩ་འཛུགས་བྱེད་མི་ཆོག་ལ།རང་དགར་སློབ་འགོ་འཛུགས་མི་ཆོག
བཞི།མེ་ཟོན་བདེ་འཇགས་དང་བདེ་འཇགས་ཐོན་སྐྱེད་ཀྱི་མངོན་མེད་རྐྱེན་ངན་བཅོས་སྒྲིག་ཡག་པོ་མ་བྱས་པ་དང་།གཏན་འབེབས་ལྟར་མེ་ཟོན་བདེ་འཇགས་དང་བདེ་འཇགས་ཐོན་སྐྱེད་ཀྱི་ཞིབ་བཤེར་རྩིས་ལེན་རེ་ཞུའི་འགྲོ་ལུགས་མ་བསྒྲུབས་པའི་ཁེ་ལས་དང་།གཏན་འབེབས་ལྟར་དུག་སེལ་སོགས་རིམས་འགོག་བྱ་ཐབས་མ་སྤྱད་པ་དང་རླུང་རྒྱུག་ཆ་རྐྱེན་ཡག་པོ་མེད་པའི་ས་འོག་ཚོང་ར་སོགས་ཐོན་སྐྱེད་གཉེར་སྐྱོང་བྱེད་གནས་ཚང་མ་ལས་འགོ་འཛུགས་མི་ཆོག
ལྔ། ལས་བཟོ་བའི་བདེ་ཐང་གི་གནས་ཚུལ་དང་རིམས་ནད་ཕོག་རིང་གི་འགྲོ་འོང་སོགས་གཞི་རྩའི་ཆ་འཕྲིན་གྲལ་བཤེར་ཐོ་འགོད་ཆ་ཚང་པོ་མེད་པ་དང་།གཏན་འབེབས་ལྟར་མི་སྣའི་ཆ་འཕྲིན་ཐོ་འགོད་སྙན་སེང་ཞུས་མེད་པ།དེ་བཞིན་ལས་གནས་སུ་མ་ཞུགས་གོང་གི་རིམས་ནད་སྔོན་འགོག་ཚོད་འཛིན་གྱི་ཤེས་བྱའི་གསོ་སྦྱོང་བྱས་མེད་པ་བཅས་ཚང་མ་ལས་འགོ་འཛུགས་མི་ཆོག
དྲུགབླང་བྱ་ལྟར་རང་ཁེ་ལས་དང་།ལས་ཁུངས།གཉེར་སྐྱོང་བྱེད་གནས་ཀྱི་མཚོ་སྔོན་དུ་ལོག་པའི་ལས་གཉེར་མི་སྣར་ཉིན14རིང་ཁྱིམ་སྡོད་ཟུར་བཀར་དང་གསོ་རིག་ལྟ་ཞིབ་ཀྱི་བྱ་ཐབས་དོན་འཁྱོལ་མ་བྱས་པའི་ཁེ་ལས་དང་།སྒེར་གཉེར་བཟོ་ཚོང་།ལས་ཁུངས་བཅས་ཚང་མས་ལས་འགོ་སློབ་འགོ་འཛུགས་མི་ཆོག
མཚོ་སྔོན་ཞིང་ཆེན་མི་དམངས་སྲིད་གཞུང་།
2020ལོའི་ཟླ2པའི་ཚེས2ཉིན།
